الدرس الأول الحزء الثاني : تحويل ذوق الكاوكاو الى بيستاش و تلوين الجلجلان و السكر و النوادكوكو

الدرس الاول/الجزء الثاني
السلام عليكم و رحمة الله و بركاته، البارح قدمتلكم بعض نصائح حول اللوز و طريقة الحفظ،ايضا تحويل مذاق الفول السوداني (الكوكاو) الى ذوق اللوز
– اليوم ان شاء الله نكملكم طريقة تحويل ذوق الكوكاو الى بيستاش
– وتلوين كل من الجلجلان و السكر و النوادكوكو
– الكوكاو
– اولا نضع رطل كوكاو مدشش خشين وطبعا تستعملي الكمية الي حبيتي
-نفوروه المرة الاولى على الماء وملعقة كبيرة لافاني و شرائح حبة ليمون مدة دقيقتين
– نفوروه للمرة الثانية على خليط ماء وماء زهر و ملعقة صغيرة لافاني و 4 حبة قرنفل ونخليوه لمدة دقيقتين ،من بعد نحطوه وهو سخون في القصعة ضيفولو ملون اخضر.كملو حتى تتحصلو على اللون الي حبيتوه ،من بعد نحطوه يفور للمرة الثالثة هاذي المرة نستعملو ماء زهر وحدو ونضيفولو 2 ملاعق كبار نكهة بيستاش ،كي يفور نفرغوه في القصعة ونشوفو اللون اذا كيما نحبو ولا نزيديولو شوي ملون ولكن وهو سخون قبل ما يبرد باش بتشرب هاذيك الصبغة مليح
من بعد نحطوه في ورق الزبدة ونحطو عليه حاجة ثقيلة باش يخرجلنا هذاك الزيت كامل ونغيرو ورق الزبدة زوج مرات او ثلاثة لمدة يومين ،من بعد تقدرو تحطوه في الفرن على اقل درجة باش يتحمصلكم شوي ،و تستعملوه حسب وصفاتكم والي تكون مستعجلة تقدر مباشرة تحطو ينشف في الفرن على اقل درجة لكن ماراحش يعطيك نفس الذوق و اللون كيما ينشف في الهواء .لانو كي نحطوه في ورق الزبدة نخرجولوالزيت نتاع الكوكاو خطراش ريحة الكوكاو و الثقالة نتاعو تجي من هذاك الزيت .
– تلوين الجلجلان :
– هناك نوعين من لون للجلجلان اما تحبوها مخدومة بالملون او بالملمع :
– جلجلان بالملون: تحكمو كمية من جلجلان تنقيوه و تغسلوه و تقطروه مليح من بعد تضيفولو الملون الي حبيتو و تبقاو تحركو بيديكم حتى تتحصلو على اللون الي حبيتو من بعد تخليوه ينشف في الهواء واذا كنتو مشتعجلين تقدرو تسخنو الفرن مليح من بعد طفيوه وحطو فيه جلجللان ومرة على مرة حركوه .
– الجلجلان اللماعة : مباشرة تحكمو جلجلان بيضاء و تحطو عليها الملمع الغذائي الي حبيتو و تمسحوه اما باسفنجة او بانسو هكذا تتحصلو على جلجلان لماعة لتزيين الحلويات كيما راني موضحتلكم في الصورة
– ملاحظة :
– استعملو القفازات باش ما يتخلطولكمش الالوان و تجيكم خدمة نضيفة
– الجلجلان اذا حبيتيوه محمص حمصوه قبل ما تصبغوه ودايما استعملو الجلجلان الابيض
تليوين السكر::
– نتبعو نفس الطريقة نحكمو ملون غذائي نديرولو شوي ماء و نرشو بيه السكر و نبقاو نحركو بيدينا كيما البربوشة –الطعام – حتى نتحصلو على اللون المرغوب ،ما تكثروش الماء في الملون باش السكر ما يذوبش اما تحبو تخليوه ينشف في مكان جاف او تحبو تسخنو الفرن وطفيو عليه ودخلو السكر وكل مرة تحركوه حتى ينشف تماما هذا بالنسبة للسكر الي نزينو بيه الحلويات،من بعد تحبو غربلوه تخرجو منو الخشين و الرقيق حسب احتيياجاتكم في الديكور.
اما السكر الي يديروه في المناسبات و الاعراس نفس الطريقة فقط تحطوه في قوالب السليكون و تسخنو الفرن طفيو عليه ودخلوه ينشف يخرجلكم حبات سكر ملون.
– تلوين جوز الهند : نجيبو كمية من جوز الهند و نضيفولها ملون نكونو خلطناه بالماء و تبداو تحركوه كيما البربوشة-الطعام- هنا جوز الهند ما تخافوش عليه من الماء راح يشربلكم الماء الملون ماش كيما السكر،افتلوه مليح بيديكم حتى يختفي اللون الابيض تاع جوز الهند و نتوما الي تتحكمو في درجة اللون الي حبيتو من بعد خليوه ينشف اما في الهواء الطلق او الفرن ينفس الطريقة،تسخنو الفرن و طفيوه ودخلوه ينشف
– تقدرو تحضرو الالوان الي حبيتو من الجلجلان و السكر و النوادكوكو و تحتافظو بيها في اكياس وتستعملوها في تزيين حلوياتكم
– بالنسبة لكل انواع المكسرات الي كنتو حمصتوهم من قبل ما ترحيوهمش حتى وقت الاستعمال باش تحتافظو بالنكهة تاعهم او عاودو دخلوهم للفرن على نار جد هادئة باش تعاود توليلهم البنة .
– ان شاء الله تكونو استفدتو من هاذو التدابير سواء الي ما يقدروش يشريو اللوز و البيستاش او للمبتدئبات يحبو بتعلمو في الكوكاو اولا من بعد يروحو للوز .
اي سؤال انا في الخدمة