الدرس 20 : طريقة تحضير عجينة السكر بطريقة جد ناجحة و لذيذة

السلام عليكم ورحمة الله وبركاته ،عند طلب العديد من متتبعي الصفحة اليوم نقدملكم طريقة تحضير عجينة سكر بطريقة جد ناجحة و لذيذة وماش حلوة بزاف ،عجينة السكر الي نستعملوها للتزين و تغليف الحلويات
– ضروري جدا انكم تتقيدو بالمقادير رجاءا ،الحلويات لازملها دقة في الميزان ،ماشي تقولو كيليلي بالكاس او الملعقة

المقادير :

رطل سكر ناعم
2 بياض بيض
ورقة جيلاتين وزنها تقريبا 7 غ نحطوها في قليل من الماء البارد ، و تقدرو تستعملو جيلاتين غبرة تقريبا 3 ملاعق صغار غبرة تديرولهم ماء سخون
ملعقة صغيرة غلوكوز حطوها في قليل من الماء
2 ملاعق كبار خل ابيض

طريقة التحضير :

المرحلة الاولى :
– اولا نحطو بياض البيض ونفرغو عليه ملعقتين سكر ناعم ونبداو نخلطوه حتى يتجانس من بعد نحطو كامل الكمية ونحطوه في العجانة ونستعملو الورقة للعجن (la feuille )
نضيفو الغلوكوز ،الخل الابيض وهنا دور تاعو هو تخفيض درجة الحلاوة نتاع السكر ،ونخلو الخليط يتخلط جيدا حتى يرجع كيما الصورة رقم 1
– نحيو ورقة الجيلاتين من الماء البارد ونحطوها في ماء ساختن ونحركوها جيدا حتى تذوب ونضيفها للخليط ونواصلو الخلط جيدا حتى ترجع كيما الصورة رقم 2
– المرحلة الثانية :
نغربل رطل من السكر الناعم ونبدا نضيف في العجانة وهي تتخدم حتى نتحصلو على خليط طري ،لازم يكون طري لانومن بعد كي نخليوها تريح رايحة تنشف لوجود الغلوكوز و الجيلاتين .
– نفرشو طاولة العمل بالسكر الناعم ونحطوها فوقها الخليط لموها مليح وحطوها في ورق غذائي شفاف سكرو عليها جيدا

ملاحظات :
– استعملوا السكر الناعم نوعية جيدة ومن افضل الانواع سكر المرجان
– ما تضيفوش النشاء لعجينة السكر لانو هو يخليها تصفار
– اذا خدمتوها بالطريقة الصحيحة تقدرة تحتافظو بيها في الثلاجة مدة شهر
– اذا كان جو بارد تقدرو تحتافظوا بيها خارج الثلاجة
– الي ما عندهاش عجانة المرحلة الاولى تقدري تستعملي الضراب الكهربائي وكي تبداي تضيفي السكر وتبدا تثقال العجينة كملي العجن بيدك .
– في الدرس القادم ان شاء الله نحطلكم طريقة تحضير عجينة السكر بالمارشملو
و بمناسبة اقتراب شهر رمضان رايحة نحطلكم طريقة الزلابية الوصفة الاصلية ،وكل الانواع المعسلة الي تتباع في رمضان
– اضافة الى العجينة المورقة الي تخبيوها تستعملوها في المملحات ،و ايضا طريقة تحضير تارتولات .
انشرو الدروس خلي الناس يتعلموا و يستفادوا