الدرس22 : زلابية الوصفة الاصلية
،اليوم ان شاء الله نعطيكم الوصفة الاصلية للزلابية بالنسبة لزلابية السميد او ما يعرف بزلابية بوفاريك تستعملو السميد كما هو موضح اما زلابية نوع الاخر الي عادة يكون لونها احمر او اصفر استعملو الفرينة .
كلغ سميد رقيق يكون نوعا ما يميل للمتوسط ،او تقدرو ديرو نص كلغ سميد رقيق ونص كلغ سميد متوسط
- لتر ماء
- 30 غ خميرة الخبز
- ملعقة صغيرة ملح حسب الذوق
- ملعقة صغيرة سكر
- ملون حسب الرغبة
- منكهات حسب الرغبة
العسل :
- كلغ سكر ،لتر ماء
- 2 اكياس شاي
- نص حبة ليمون
طريقة التحضير :
اولا نحطو السميد و الماء الدافيء و الخميرة ،دايما وزن السميد هو نفسه وزن الماء ،في الوصفة الاصلىة القديمة نخلطو الخليط ونحطوه جانبا في المطبخ نخليوه مدة 3 ايام كاملة اي 72 ساعة بشرط يكون جو بارد ماش سخون اما اذا كان فصل الصيف مثلا حطو الخليط في الثلاجة ،بعد 3 ايام تضربو هاذاك الخليط رايح تلقاوه رجع سائل تضيفولو الملح حسب الذوق و السكر و المكنهات الي هي اما الهيل مطحون او الفانيلا ،هنا لازم ديرو منكهات باش تغطيلكم على ريحة الخميرة
الطريقة الثانية :
هي اننا نقصو المدة من 72 ساعة الى 48 ساعة
نديرو نفس المقادير لكن كل ما نلقاو الخليط اختمر نعاودو نحركوه ،يعني مرة على مرة تضربو طلة على الخيط تهبولو تخمار رايح تلقاوه بعد كل مرة تخلطو فيها رايح يتحول الخيط من عجين الى سائل ،
لازم نوصلو لقوام خليط ثقيل نوعا ما ،ما يتقطعش بشرط لازم تتنبهو لهاذي النقطة ما تخلوهش يلحق مرحلة سائل بزاف يشبه للماء .كي تلحق للمرحلة هاذي عودو حركوها غير بالمغرف كيما الطريقة الي نحركو بيها الغريف (البغرير )
نكملو بنفس الطريقة نحطو الملح و السكر ونبداو نطيبو و المنكهات و اللون اذا حبيتوها بالالوان سواء اصفر او حمر
طريقة الطياب لازم يكون الزيت سخون لكن درجة الحرارة متوسطة
استعملوا للمبوط باش تشكلو زلابية ،ولازم كل مرة تحركو الخليط غير بالشوي ما لازمش يكون فيه فقاعات تاع التخمار خطراش تفسدلكم الشكل وتجيكم مثقبة
ما لازمش تحركوها بزاف باش ما تجيكمش فيها رغوة اذا جات فيها الرغوة رايح حبة زلابية تجيكم مثقبة ،في حالة غلطتو لحقتو للرغوة استعملوا الميكسور وخليوها تخمر مرة وعاودوه بطولها تخمار
طيبو زلابية تاعكم مليح حمروها كي تخرجوها مباشرة دخلوها في العسل
بالنسبة للعسل :
استعملوكلغ سكر،لتر ماء ،نص حبة قارص حطوهم فوق النار غير يبداو يغليو نقصولهم وخليهم يطيبو على نار متوسطة كي تشوفوه قريب راح يوجد حطو فية 2 كيس شاي ما يكونش فيه اذواق كيما نعناع او كراميل ،لازم ذوق شاي فقط ،دور الشاي هنا هو انو ينقصلنا الحلاوة نتاع العسل .مدة الطهي تقريبا 20 دقيقة المهم حتى تتحصلو على القوام المطلوب للعسل .
بالنسبة لزلابية بوفاريك عندهم شكل المقلى الي راهو في الصورة يستعملوها مستطيلة باش يقدرو يديرو حجم كبير للحبة
كاين انواع من زلابية بوفاريك الي يحب يزيدلها كوكاو او لوز ،لازم تحمصوهم و ترحيوهم غبرة وتضيفوهم للخليط في البداية نتاعو
اي سؤال انا في الخدمة
