بيتزا كوكا(المغلفة)
Recette réalisé par @thealgerianomad
المكوّنات :
العجينة :
- كاس حليب
- 0.5 كاس زيت
- حبة بيض
- ملح
- ملعقة صغيرة معمرة خميرة الحلوى
- فرينة حسب الحاجة
- زبدة دايبة حسب الحاجة
- مايزينة حسب الحاجة
بالنسبة للحشوة(حسب الذوق) :
- لحم مفروم
- 3 حبات بصل مقطعين
- حبة طرشي
- راس حار
- 2 حبات طماطم
- زعيترة
- ملح
- فلفل اسود
- جبن طري
للتزيين :
- حبة بيض
- ملعقة شاي نيسكافي
- زيتون
الخطوات :
نبداو بالحشو :
نحطو البصل و اللحم المفروم و الطرشي و الحار و الزعيترة في شوية زيت نقلوهم مليح نضيفو الملح و الفلفل الاسود و فنجال ماء و نخلوهم يطيبو من بعد نحطو الطماطم مقطعة رقيق و نخلوها تنشف مليح
بالنسبة العجين في ليان نحطو البيض و الحليب و الزيت و الملح نخلطوهم مليح من بعد نضيفو خميرة الحلوى و نطمو بالفرينة
نقسمو لعجينة على ربعة نحلو لعجينة الاولى مليح نستعملو المايزينة باش متلسقش و نحطوها بجيهة و نزيدو نحلو الثانية و ندهنوها بالزبدة الذايبة و نحطو فوقها لعجينة الاولى لي حليناها و نزيدو نحلوهم مع بعض و نطووهم كيما لمسمن على ربعة… و نعاودو نحلوها مليح مليح و نفرشوها فالسنيوة
نفرشو الحشو تاعنا فوق لعجينة
و نعاودو نحلو لعجينة لي بقالنا بنفس الطريقة باش نحطوه فوق الحشو و نقسموها كيما فالصورة و ندهنوها البيض(بيضة و ملعقة نيسكافي) و نزينوها بالزيتون و ندخلوها للفرن طيب مالفوق و مالتحت و تتحمر مليح
شهية طيبة
