حلوة الطابع و اسرار نجاحها مع بعض الافكار

حلوة الطابع ..حلوة تقليدية معروفة في كل البيوت الجزائرية مع الاضافة لها في بعض الافكار و اسرار نجاحها ..

– حلوة الطابع حلوة تقليدية تقدرو تبداو بيها مشروع مصغر عجينة واحدة وتعطيكم اشكال كثيرة .

المكونات

– 4 حبات بيض
– 200 غ سكر
– 200 ملل زيت
– كيس ونصف الى 2 كيس خميرة كميائية
– مبشور ليمون
– ملعقة كبيرة سكر فانيلا
– فرينة (طحين -فورص)
للدهن :
– بيضة كاملة + م صغيرة فانيلا + م صغيرة قهوة سريعة الذوبان
للتزين
– سكر غربلوه في صفاية رقيقة نستعملو الخشين
– حلوة فارميسال
– نخلط البيض مع السكر ،السكر فانيلا ومبشور الليمون و الزيت بالخلاط كهربائي او مضرب يدوي او حتى كف اليد حتى تتجانس المكونات جيدا ثم نضيف الفرينة الي كنا غربلناها من قبل ونضع معاها الخميرة ،نبقاو نخلطو حتى نتحصلو على عجينة متماسكة ما تتلاصقش في اليد
– نحلو العجين على طاولة عمل مرشوشة بالفرينة ونقطعو الحلوى بالطوابع التقليدية المعروفة و تكون العجينة بسمك 2 سم الى 23 ملم ،وهذا هو سر من اسرار حلوة الطابع انها تكون سميكة .. لبنى
– البقايا من العجين تجمعوه دون عجن وتعاودو تحلوه .
نحطوها في صينية الفرن ندهنوها بالبيض ونزينوها اما بالسكر او حلوى الشربة (فارميسال)
– نطيبها في فرن مسخن مسبقا على درجة 180 درجة ،تقريب 25 الى 30 دقيقة حتى تتحمر مليح ..

– من علامات نجاح حلوة الطابع هو ظهر تشقق على سطح حبة الحلوى
– اذا زينتو بالسكر حطوه في وسط الحبة فقط ما توزعوهش على الحبة كاملة لانو ما يخليش الحبة تنتفخ كما يجب .
– اهم ملاحظة لازم حلوتكم تكون منكهة إما بالليمون أو الفانيلا باش ما تجيش فيها ريحة البيض .
– هذه العجينة هي نفسها عجينة الكروكي ،و عجينة حلوة الطلية التقليدية و حلوة اللمبوط ،وايضا حلوى المبروشة
-اذا درتو بيها حلة الطلية نقصو من سمك العجينة ما لازمش تكون بنفس ارتفاع حلوة الطابع يعني بدل ما ديرو 2 سم ديرو 1 سم،و استعملوا طلية اللي تحبوها
– اذا درتو حلوة اللمبوط لازم تخليو العجينة طرية نوعا ما باش تخرجلكم من اللمبوط
-وتقدرو نفس العجينة تشكلو منها هليلات او اساور و ترمدوهم في السكر فقط انتبهو للحجم لازم يكون صغير لانو فيها كمية معتبرة من الخميرة