دروس

الدرس الحادي عشر 11 طريقة الاحتفاظ بالغرس

الدرس الحادي عشر 11 طريقة الاحتفاظ بالغرس
مساء الخير حبيباتي ،راكم عارفين موسم التمور في بلادنا يجي مرة في العام مع شهر سبتمبر،منتجين التمور ينحيو الغلة و يخبيوها في غرف التبريد باش يبيعوها على طوال العام
كاين التمور كي توصل لباعة التجزئة تجيو تشريوها تلقاوها غالية و بزايدة فيها ريحة بحماضة.
نعطيكم طريقتي في حفظ التمور :
اولا الدقلة و وبنت قبالة او اي نوع نشريوهم في وقتتهم يكونو سعرهم منخفض بزاف ونخبيوهم في المجمد في اكياس شفافة،يعني نختصر في بلاصة ما نشريها من عند الي خباوها في المجمد نتاعهم بسعر مرتفع ،نخبيها في المحمد نتاعي وناكلها نظيفة و جديدة بسعر معقول جدا.


– ثانيا الغرس اشريو كمية قيس ما تخدمو طوال سنة و الي يخدمو الحلويات يشريو كميات كبيرة. نشري الغرس في وقتو من بعد نقيه مليح ونحيلو كل الزوائد الي فيه ،ونظن خدمة يدك واحد ما راح يخدمها كيفك ماش كيما هذاك الي يتباع برا معجون يرحيوه بالعلف بالدود بالريش تاع الحمام يعني يرحيو بكل شيء ماش رايحين يكسرو روسهم ينقيوه.
بعد ما تنقيه فوريه زيديلو شوي زبدة و اعجنيه بيديك .الي عندها مشينة الي ترحي اللحم تعقبو فيها خير وخير يجيها روعة وتتحرى حتى القشرة البيضاء الخشينة.الي ما عندهاش تقدر تستعمل الميكسور.
ديريه حرابش في ورق شفاف وخبيه في الثلاجة اوالمجمد،


كي تحطيه في المجمد وقت الاستعمال اجبديه ليلة
كي تححطيه في الثلاجة اجبديهه ساعة قبل الاستعمال
انا نخبيه في المجمد و دايما حاطة حربوش في الثلاجة نستعملو كي تجيني حاجة مستعجلة . المنكهات انا نستعملهم في وقت الي رايحة نطيب بيه كيما القرفة و القرنفل.

360 degrés

360 degrés vous propose plusieurs recettes variées , faciles à réaliser et bien entendu succulentes .
زر الذهاب إلى الأعلى