دروس

الدرس الخامس : حلوة النوقة بالجلجلان

الدرس الخامس/حلوة النوقة بالجلجلا
،اليوم مع درس جديد ان شاء الله نكون نفيدكم ولو بالقليل.
الوصفة هي نوع من النوقة مخدومة بالجلجلان مليحة للاعياد و المناسبات تمشي مع لاتاي
-كاين طريقتن وانا نعطيكم الطريقة الساهلة فيهم
-اولا احكمو قطعة نتاع ورق الزبدة ادهنوه بشوي زيت حطوه جانيا

المقادير :

  •  2 كيلات جلجلان
  • نص كيلة سكر
  • نص كيلة عسل
  • مغرفةصغيرة مرغرين
  • مغرفةصغيرة عصير ليمون

طريقة التحضير :

-اولا حمصو جلجلان بيضا في الكوشة على اقل درجة عندكم حتى تاخذ لون ذهبي فاتح ما تخليوهاش حتى تطلق الزيت وما تحمروهاش بزاف .
– حطو السكر مع العسل فوق النار و زيدولهم القارص و ابقاو تحركو كي يبدا يذوب يبدا يغلي خطراش السكر راهو يتحول للكراميل كي يبدا الخليط يغلي نقصولو على نار هادئة و احسبو 4 دقائق قدقد مع التحريك ما تزيدو ما تنقصو ،بالاكم طولو معاه يجيكم حجرة
كي تلحقو 4 دقائق زيدولو ملعقة نتاع المرغرين خلطوها مليح حتى تتجانس و حطو عليه الجلجلان حركو الخليط بسرعة ومباشرة حطوه فوق ورق الزبدة و حطو فوقو نيلون مدهون بالزيت او ورق زبد و ديرو طرشونة و ابداو اعدلوها شوي بيديكم من بعد نحيو الطرشونة و حلوها بالحلال .


– لازم تقطعوها وهي سخونة باش تقدرو تشكلوها كيما حبيتو
– مثلا السلة قطعو دوائر من بعد دوروهم على الحلال و قطعو مستطيلات طوال باش تخدمو بيهم ذراع نتاع السلة .
– تقدرو ديروهم دوائر و تقلبو مول السليكون و تشكلو شبه صحن تحشيوه بالنوتيلا و تزينوها بالجوز
-تقدرو تستعملو مول نتاع دزيريات وتشكلو بيه
– تقدرو تحلوها بسمك 5 سم وتقطعوها مستطيلات متساوية بالموس


الطريقة الثانية
هي انكم تعوضو العسل العادي بعسل الغلوكوز يعني العسل الابيض الشفاف
هنا تستعملو العسل الابيض خطراش السكر ابيض كي تحطوهم في كسرونة و يبداو يذوبو تقدرو تتحكمو في اللون الذهبي نتاع الكراميل.
– 150غ سكر زيدولها 150 غ عسل غلوكوز مع ملعقة صغيرة عصير ليمون و ملعقة صغيرة مرغرين و حطوهم فوق النار حتى يصبح اللون كراميل فاتح ما تخلوهاش تتحرق ،
– ضيفو الجلجلان من 150 حتى 200غ المحمصة للخليط ونحيوه من فوق النار وتبعو نفس الطريقة السابقة.
– تقدم مع لاتاي في الاعراس و السهرات و المناسبات وخصوصا سهرات رمضان
ملاحظة :
– الى عندها تارمومتر نتاع الحلويات تقدر كي تكون تخدم في السكر مع العسل كي يوصل 135 درجة تنحيها
– هاذي الحلوة لازملها السرعة في الخدمة باش تقدرو تشكلوها قبل ما تيبس
– في حالة يبستلكم ونتوما تخدمو فيها مثلا قطعتوها دوائر و يبست حطوها في صينية ودخلوها في الكوشة على نار هادئة قيس ما تدفا فقط ونحيوها وكملو العملية .
– هاذوك الزوائد كل مرة دخليهم للكوشة يعاودو يذوبو شوي و عاودي شكليها من جديد
– حاولو تخدموها فوق الحطب و في مكان دافي انا خدمت فوق رخامة باردة ثم ثم تيبسلي
-بالنسبة للذوق تجيكم مقرمشة ماش يابسة ،تقريبا كيما تقرمشو قفريط كورنيطو .
– التزيين يكون كيما حبيتو انا درتهم سليلات بالتمر و خدمت سليلات عمرتهم مكسرات وخدمت سيقار محشي بالمكسرات ،ونخليلكم المجال للابداع.

360 degrés

360 degrés vous propose plusieurs recettes variées , faciles à réaliser et bien entendu succulentes .
زر الذهاب إلى الأعلى