دروس

الدرس السابع : التشاراك المسكر بالتفصيل

السلام عليكم . نواصل دروس سلسلة تعلم الحلويات. الدروس السابقة تجدونها في الموقع من هنا او في الصفحة .

الكثير من الاخوات عندهم مشكل مع التشاراك المسكر.كاين الي يجيهم الحشو لداخل يابس.كاين لي عندها مشكل السكر ما يشدلهاش في حبه التشاراك.كاين الي شكل التشاراك كيما تقوسو ما يجيهاش هلال..
اليوم ان شاء الله نجاوبكم على كل الاسئله الخاصه بالتشاراك
نبداو على بركه الله
تشاراك مسكر : اصل كلمة تشاراك هي عثمانية ومعناها الهلال .

العجينة :

  1. 3 كيلات فرينة نضيفولها رشة ملح و كيلة سمن ذايب و بارد.دايما نقولكم سمن بارد باش ما يكلحكش الماء.
  2. خلطيهم مليح بيديك من بعد اجمعيه بخليط ماء الزهر +ماء .تتحصلو على عجينه تكون طريه كيفاش تعرفو بلي ما تزيدولهاش الماء.لازم كي تقوسوها ما تتشققش.

  1. خليو العجينة تريح على الاقل نصف ساعه.لكن افضل تخليوها تبات باش تتحصلو على نتيجه روعه و
    تعطيكم الطوع في الخدمه.

الحشو :

  1. 3كيلات لوز مرحي زيدولو كيلة ناقصة قدر اصبع سكر عادي و ملعقة صغيرة فانيلا
  2. ملعقة كبيرة سمن ذائب(دايما نستعملو لكل 100 غ لوز ملعقة كبيرة سمن.هنا السمن ضروري باش يجيكم الحشو طري) نخلطوهم مليح و نزيدو ماء الزهر و اعجنوه مليح حتى يدخل السكر في اللوز باش يجيكم تشاراك معسل من داخل..ما.لازمش يكون الحشو يتلاصق خطراش يكون سبب في خروجو من العجين و يتحرقلكم .ما ديروهش ناشف يتفتت لانو كي يطيبلكم الحشو يجي يابس.

طريقة التشكيل :

  1. نقسمو العجين الى كريات 30 غ ،نشكلو كل كرية على شكل حربوش ثم نحلوها بسمك 2 ملم و طول 12 سم ،نضع الحشو على الطرف العجين ونلفوها كي نلحقو لطرف الاخر نعبزو مليح على العجين بالاصبع ونغلقو اللفة .هنا نعبزو عليها باش كي طيب ما تنفخش وما تجيش هاذيك الحاشيه تبان .

  1. الحشو ما لازمش يخرجلكم على الاطراف لانو كي يطيب التشاراك تدي لون ذهبي الاطراف يتحرقولكم.
    نشكلو التشاراك على شكل هليلات نغطيوهم و نخليوهم يريحو نصف ساعه قبل ما نطيبوهم باش يحافظو على شكلهم .
  2. نكملو كل العجينة بنفس الطريقة و نطيبوهم في فرن ساخن مسبقا على درجة 180 درجة لمدة 20 دقيقة تقريبا حتى يصبح لون التشاراك ذهبي من الاسفل فقط .لازم تعسوه في الطياب ما لازمش يتحرقو الاطراف.
  3. نخليو تشاراك يبرد مليح و ننتقل لعمليه الطلي بالسكر

طريقة الطلي :

  1. اولا نحضر الشربات في وعاء نخلط 200غ السكر الناعم مع 400 غ ماء الزهر و2 مغارف الفرينة ونخلط حتى نتحصل على خليط متجانس.هنا نستعملو هذا الخليط باش يشد مليح السكر في تشاراك ومن جهة اخرى ما يجيش يابس.
  2. نحطو في وعاء سكر ناعم مغربل زوج مرات.
    نحطو حبات التشاراك في الشربات نخليهم يقطرو قليلا ما لازمش يطولو في شربات دخلوهم و خرجوهم .كي يقطرو نحطوهم في السكر الناعم نحركوهم فيه مليح ثم نخرجوهم يريحو ربع ساعة ونعاودو ندخلوهم في السكر الناعم مرة اخرى ثم نمسحو الزائد من السكر براحة اليد من الاسفل و ندورو اصبعين السبابه و الابهام على تشاراك حتى نحيو السكر الزايد ،
  3. قبل ما نحطوهم في كيسات التقديم نرشوهم بسكر ناعم باستعمال صفاية

هاذي الوصفه تقدرو ديرو بيها كعيكعات مسكرين و تقدرو ديرو بيها تشاراك الطليه..في الدرس الجاي ان شاء الله نحطلكم انواع الطلية.
ان شاء الله تتوفقو في صنع التشاراك.

360 degrés

360 degrés vous propose plusieurs recettes variées , faciles à réaliser et bien entendu succulentes .
زر الذهاب إلى الأعلى