دروس

الدرس 23 : زلابية السكرفاج او زلابية الكوكياج

الدرس 23 : زلابية السكرفاج او زلابية الكوكياج
اليوم باذن الله نعطيكم وصفة هاذي الزلابية ديروها في السهرات  ان شاء الله هاذي الكمية ديرلكم صحن كبير

المقادير :

  •  250 غ فرينة
  • 100 غ سميد رقيق
  •  ملعقة سكر  5 غ سكر
  •  ملعقة صغيرة خميرة في حدود 3 غ
  •  رشة مليح في حدود 2 غ
    منكهات ترجع ليكم اما لافاني او ذوق ماء زهر او
  • مبشورليمون الذوق يرجع ليكم
  • 65 غ زيت
  •  160 غ ماء
  • عسل ومن الافضل اصنعوه كيما ذكرتو في الدرس السابق

طريقة التحضير :

اولا نحطو الزيت يدفى ،ونخلطوا السميد مع الفرينة و السكر و الخميرة و الملح و لافاني ،من بعد نضيفولها الزيت الدافيء نحركوها جيدا ثم نضيفو الماء تدريجيا ،هنا كمية الماء ترجع لنوعية السميد و الفرينة ،لازم نتحصلو على عجينة متماسكة وما تكونش طرية باش تجيكم مقرمشة


خليوها تخمر ربع ساعة من بعد شكلو كويرات 15 غ او تحبوها اقل هاذا يرجع ليكم ،ثم نستعملو السكرفاج

في الاصل نشكلو شوي من العجين شكل اصبع من بعد نحطوه في سكرفاج جيهة الرقيقة وندخلو صباعنا في الوسط ونضغطو ونزلو للتحت ،بما انو هاذي طريقة يصعب نفهمهالكم الا اذا كنتو في التطبيق مباشر ،ديرو طريقة وضحتهالكم في الصور ابسطو العجينة على سكرفاج ثم اسحبوها من فوق للتحت تتشكلكم و مباشرة اقليوها ما تخليوهاش تعاود تخمرلكم باش تجيكم مقرمشة من فوق ،ديروها في زيت غزير يكون سخون على نار متوسطة و لازم تحمروها جيدا من تحطوها في الزيت ابقاو تحركو فيها باش تدي كامل لون واحد


كي تخرجوها مباشرة دخلوها للعسل تريح شوي فقط ونحيوها ما تخليوهاش بزاف في العسل باش ما تجيكمش حلوة تقهم
زينوها بالجلاجلان ،
تقدرو ديروها حبات صغار و تقدموها في كؤوس في رمضان
جربوها وفرحو عايلتكم و نقولكم شهية طيبة و اي سؤال انا في الخدمة .

360 degrés

360 degrés vous propose plusieurs recettes variées , faciles à réaliser et bien entendu succulentes .
زر الذهاب إلى الأعلى