دروس

الدزيريات و اسرار نجاحها

الدرس الثالث / الدزيريات
السلام عليكم ورحمة الله و بركاته ، مرحبا بيكم معايا في الدرس الثالث الخاص بالحلويات و مع سلسلة عجينة الفرينة و ليدام ،اليوم ان شاء الله نديرو الدزيريات و اسرار نجاحها
العجينة: 3 كيلات فرينة +نص كيلة مرغرين توريق ذايبة و باردة +لافاني، ماء و ماء زهر
200الحشو : لوز مرحي + سكر عادي + مبشور قارص + بيض
– لاجولي.شربات . عسل
– اولا نبداو بالشربات :
– العجينة نديرو ثلاث كيلات فرينة و نزيدولها نص كيلة مرغرين التوريق – هنا نستعملو مرغرين التوريق ماشي سمن باش هاذيك الحبة نتاع دزيريات تبقى واقفة ما تتكمش ،بسوها مليح بيديكم دخلو مرغرين في فرينة و زيديولها لافاني من بعد اجمعوها بالماء وماء زهر و خليوها تريح على الاقل نص ساعة .كل ما ريحت كل ما تعطيكم نتيجة مليحة.
– الحشو : ديرو دايما كمية تاع اللوز نصها سكر ،يعني مثلا 400 غ لوز ديرولها 200 غ سكر عادي ،قشور القارص كثرو شوي باش يغطيو على ريحة البيض و ديرو لكل 100 غ لوز مغرفة مرغرين ،يعني هنا نديرو 4 مغارف كبار مرغرين ،ونخلطو بيضة كاملة مع صفار نبداو نشمخوالحشو بالشوي لازم تعجنوها مليح تحسو السكر تخلط مع اللوز .و من الاحسن تخدموها ليلة قبل باش تشربلكم و تجيكم معسلة .دايما نقولكم اللوز اعجنوه بدبزتكم ما تعجنوهش بالاصابع خطراش بالاصابع يخرجلكم الزيت نتاعو
– هنا نعطيكم ملاحظة كلغ لوز يخرجلكم 60 حبة من دزيريات .
– اوزنو اللوز 30 غ لكل حبة و جدوهم على خطرة و حطوهم جانبا و دايما يكون مغطي ما تخليوهش للهوا ينشفلكم – العجينة تاعكم جامي تعجنوها بيديكم اعجنوها في المشينة عقبو العجين نتاعكم في رقم 1 ربعة ولا خمس مرات باش هاذيك حبيبات نتاع مرغرين تروح وتولي عجينة رطبة.
– اذا مشينتكم فيها رقم 9 حلو عجينتكم في رقم 1 من بعد رقم 4 و 7 واذا مشينة نتاع رقم 7 ديرو 1 و 3 و 5 يعني تنقصو زوج ارقام قبل لخر و رشو الفرينة في طابلة الي تخدمي بيها باش العجينة ما تلصقلكمش و ما تعاودش تتكمش كي تقطعوها،
استعملو اومبروت بياس رقم 10 ما تكثروش فرينة بزاف باش العجينة الي تقعدلكم ما تيبسلكمش ،
ديرو شوية فرينة تحت ديسك نتاعكم و حطو الحشو في النص و ادهنو الحشو بشوي بياض بيض ما تكثروش باش ما تتقطعلكمش العجينة و ابداو اقرصوها سواء بصباعكم او استعملو كيردون،كي تكملو ادهنو الحشو من فوق بلاجولي باش يعطيها لمعان و يحمرهالكم مليح.
-.اذا حبيتو تستعملو نص حبة لوز ،احكمو اللوز نتاعكم شمخوه زوج سوايع في الماء تلقاو الحبة تولي تتقسم وحدها على زوج ،حطو نص حبة اللوز فوق دزيريات بلا ما تضغطو عليها باش يتنفخلكم مليح الحشو
– من الاحسن كي تخدمودزيريات خليوهم يباتو و غدوة من ذات طيبوهم باش ما يتحلوش.
– نحطوهم في سينية مرشوشة مليح بالفرينة و ندخلوهم فرن مسخن ربع ساعة من قبل على درجة 160 ،كي يحمارو نحيوها ننفضوها من تحت من الفرينة من بعد نثقبوها و هي سخونة نحطوها في شاربات باش تجيكم طرية و بنينة و من بعد نحطوها في العسل اعطيوها حقها في العسل باش تبقالكم طرية ما تنشفلكمش.
– ما تعسلوهاش بالعسل وحدو لانو العسل يعطيكم الذوق و اللمعان فقط ما يعسلهالكم لداخل .
– اذا كانت دزيريات باردة سخنو شاربات و العسل ،
– اذا حبيتو ديروها في لي مول رشوهم بالفرينة و قطعو العجين برقم 9 ،و دخلو ديسك مليح في المول باش تعطيكم شكل باهي من بعد حطو الحشو في الوسط و احكمو الموس على قفاه ديرولو الفرينة و قطعو الحشو على 4 ثم على 8
– الي ما عندهاش اللوز تقدر تخدمها بالكوكاو الي حولناه لذوق اللوز فقط زيدولو نوادكوك باش تجيكم خفيفة اشتعملي لكل كلغ كوكاو نحي منو 200 غ و عوضيها ب 200 غ نوادكوكو هكذا تجيكم خفيفة كيما نتاع اللوز و نوادكو يشرب العسل تجيكم معسلة مليح لداخل،
– ايضا الي تحب تتعلمهم من الاحسن تبدا في الكوكاو اولا كي تمشي ايدك فيها ديريهم باللوز .
– التزين يرجع ليكم و لابداعاتكم و هنا حطيتلكم بعض الصور تستافدو منهم ،لكن دايما الصح في الذوق كي تعرفو ديروهم معسلين لداخل و بنان هذاك هو الصح
– ان شاء الله نكون فدتكم ولو بالقليل ، و دايما اي سؤال انا في الخدمة

360 degrés

360 degrés vous propose plusieurs recettes variées , faciles à réaliser et bien entendu succulentes .
زر الذهاب إلى الأعلى