حلويات

الغريبية وأنواعها ، وأسرارها

1)- الغريبية العادية :

1- غريبية الزيت :

  •  3 كيلات فرينة
  • شوية ملح
  • كيلة ناقصة سكر (لا كنتي تحبيها يابسة شوية ديري سكر كريستال و لا كنتي تحبيها طرية ديري سكر قلاصي )
  • شوية قرفة
  • كيلة ونصف زيت،
  •  خميرة

حتى تتلم لعجينة خليها شوية تريح و طبعيها كيما تحبي. أنا نديرها فطابع تع معمول في مول سيليكون نديرها كراة كيما تع بكري و ديري لقرفة ملفوق جيك تهبل

 

2- غريبية لفرينة المحمصة :

  • 2كيلات ونصف فرينة محمصة
  • كيلة زبدة ذايبة وباردة
  • كيلة مش معمرة سكر رطب ، رشة خميرة

 

3- غريبية الزبدة :

  • 4 كيلات فرينة
  • كيلة مايزينة
  • كيلة سكر رطب
  • كيلة ونصف زبدة طري
  • فاني
  • خميرة

 

4- غريبية السمن :

نفسها غريبية الزيت والزبدة نحب نخلط بين سمن ذايب وزبدة أو سمن وزيت

 

الكيلة تاعي هنا هي 250غ 

يعني

#الخميرة في كيلة 250غ نستعمل نص باكي

لما يكونو 4 كيلات نستعمل 2 باكي خميرة

#إضافات هنا نحب نزيد للعجينة مكسرات ، لاغوم،شامية، نحب نحشيها

#ملونات نحب نضيف ملون غذاىي ونتحكم في لون كيما نحب.

#طياب نحب نكورها نشكلها في ليمول نطبعها بطابع

 

2)- غريبية الفستق:

  • كيلة ونصف كاوكاو بطعم بيستاش محمص ومطحون ناعم
  • كيلة سكر رطب
  • 2 كيلات زيت
  • ملعقة كبيرة زبدة طرية
  • 3 مغارف لاغوم بيستاش
  • ملون غذائي اخضر

تخلط جيدا جيداااا معا حتى تتحول لكريمة ناعم جدا نضيف الفرينة ومعاه باكي خميرة المهم نلمها ونخليها ترتاح نشكل كراة ونحشيهم الحشوة: (كيلة كاوكاو + ربع كيلة سكر وفاني ونرش بماء زهر) نحاول نشكلها كيما حبة الكرموص وننقشها بنقاش كيما لافوطو ونطيبها … نحيها ونعسلها شوي أو نرش عليها سكر رطب

 

3)- غريبية الورقة :

العجينة :

نخلط 4 كيسان الفرينة و الملح و نضيف كاس غير ( سمن +زبدة )ذايبين و نخلط جيدا ثم نضيف الماء مع ماء الزهر حتى نتحصل على عجينة طرية و متماسكة نلفها في بلاستيك غذائي و نتركها ترتاح لمدة 3 ساعات ونحلها رقيقة بزاف

الحشو:

في روبو نرحي 3 كيسان كاوكاومحمص ومرحي رطب+ كاس سكر رطب +الفانيليا و نقوم بطحنه حتى الحصول على عجينة يمكن عجنها بسهولة . نعجنها جيدا ثم نشكل حربوش (يمكن وضعها في الثلاجة حتى تتماسك و يسهل العمل بها ).. لبنى

 

#غريبية الورقة بشكل مقروضة والمشرطة والمربعة نفس المبدأ الشكل يختلف فقط..

نبسط العجينة نضع الحربوش تع لحشو في الحافة و نلف مرتين بحيث يكون من فوق طبقة واحدة من العجين و من تحت طبقتين نقصه معينات ومقروضات او شكل الوردة او قلوب دوائر … ونلصقها بنقاط ماء برك.. ونطيبو في لفور ياربي عشر دقائق

4)- غريبية الكاوكاو والجلجلان وحتى غريبية المكسرات :

هنا نفس المبدا حبيباتي اما نخدم بلكاوكاو اما بلجلجلان

  • كيلة سمن
  • 2 مغارف زيت
  • كيلة غير ربع سكر رطب
  • رشة خميرة
  •  كيلات ( كاوكاو او جلجلان) محمص ومرحي رطب مليح
  • ونلم بالفرينة

5)- غريبية بريستيج :

الطبقة السفلية القاعدة : غريبية عادية من لي في الاعلى ومن الاحسن غريبية الكاوكاو ،

الطبقة الثانية ” البريستيج”:

3كيلات كاوكاو محمص ومرحي رطب+ كيلة سكر رطب + فايتيين + 4 مغارف شامية ونعجن بنيسلي كراميل نشكلو في لمول ونخليه في الفريجيدار تحكم روحها.

نجيب حبة الغريبية نطليها بنيسلي ونلصق فوقها الطبقة الثانية ونزين بورود من عجينة السكر وخطوط شكولاطة

6)- غريبية الكراميل :

  • 4 كيلات فرينة
  • كيلة زيت
  • نص كيلة سكر رطب
  • نص كيلة كراميل( نيسلي أو توفيا أو سوبر كرام كراميل)
  • فاني
  • رشة ملح
  • رشةخميرة

360 degrés

360 degrés vous propose plusieurs recettes variées , faciles à réaliser et bien entendu succulentes .
زر الذهاب إلى الأعلى