دروس

الدرس 17 : حلوة الترك و الشامية ( بشكل خيوط) بابسط المقادير و النتيجة روعة

السلام عليكم ورحمة الله و بركاته ،اعتذر عن الغياب طيلة هذه الفترة بسبب ظروف خاصة ،
اليوم ان شاء الله راح نعملوا حلوة الترك الاصلية ،هاذيك الي تجي بشكل خيوط ماش الي تجي رطبة

المقادير :

في كسرونة نضع 2 كيلات سكر
كيلة الا ربع ماء
عصير ليمون حسب الكمية (انا هنا استعملت كاس لاتاي خرجلي هذه الكمية الي في الصورة+حطيت ملعقة كبيرة قارص )

طريقة التحضير :

نحطوهم على نار متوسطة حتى يتحول اللون الى ذهبي

 

باش نعرفو القوام المطلوب و تتأكدو بلي جاهز جيبو صحن فيه الماء هزو شوي من الخليط حطوه فيه كي يرجع كريستالي كيما في الصورة يعني راهو جاهز باش نحضرو بيه الحلوة نتاعنا

فرغو الخليط فوق رخامة تكون مدهونة بالزيت و ابداو حركو فيها غير تبرد شوي برك ابداو اعجنوها حتى تتحصلو على عجينة بيضاء كيما في الصورة

من جهة نحتاجو الطحينة ،اما انكم تشريوها جاهزة و العلبة نتاعها تدير حوالي 400 دج ،او تحضروها في البيت ، لكن الافضل تستعملو المنزلية لانو المصنعة فيها مواد حافظة.

نشكلو العجينة تاعنا الي خدمناها سابقا شكل حلقة ونحطو شوي طحينة و نبداو نجبدو فيها ونعاودو ندوروها شكل ثمانية و نطبقوها على زوج ونزيديو نجبدو حتى تنشف الطحينة ،وكل مرة نزيدو الطحينة ونعاودو نفس العملية حتى نتحصلو على خيوط رفيعة جدا و تشوفو بلي الحجم تاع العجينة يكبر

تحتاجو تقريبا كمية الطحينة ضعف كمية السكر يعني انا هنا استعملت 4 كيسان طحينة .-تاع لاتاي –
كي تكملو افتحوها في الو سط و حطو عليها المكسرات الي حبيتو وعاودو اعجنوها ما تخافوش الخيوط تبقى كيما راهي شكلوها كيما تحبو وتقدرو ديروها في مول السليكون وديروها في لي كيسات.

ملاحظات :

اذا كان عندك جو بارد حاولي تخدمي قريب للكوشة باش تجيك العملية سهلة

اذا ما عندكش الرخامة تقدري تتسعملي قطعة تاع السليكون او شكارة تاع حليب الغبرة فارغة

اذا تقطعلك حبل الخيوط ما تخافيش كملي العملية رايحة تنجحلك

ما تخليش الخليط فوق النار يتحولك الي لون كراميل يعني بني لانو يفسدلك الذوق.

هذا النوع ما يحتاجش الغلوكوز وما تجيش حلوة بزاف تقهم .

طريقة تحضير الطحينة :      
كاس جلجلان ،كاس فرينة، ونص كاس زيت ،اولا ديرو جلجلان بيضاء تحمصوها في الفرن على نار هادئة جدا حتى تاخذ لون ذهبي فاتح ما تحمروهاش بزاف،،تخليوها تبرد ثم ترحيوها في رحاية لازم ترحيوها مليح حتى تتحصلو على عجينة يعني حتى تطلق الزيت نتاعها ثم تزيدولها الفرينة بالشوي وترحيو ،وتزيدو شوي زيت قيس ما تتحرحر،يعني تضيفو الفرينة على مرحلتين ،وتبقاو تزيدو الزيت حتى تتحصلو على خليط قوام نتاعو كيما نتاع عجينة الكريب ،خلطوها جيدا باش تتجانس وما يتفصلش الزيت على المكونات الاخرى ،احتافظو بيها في علبة محكمة الغلق في الثلاجة تستمر معاكم لمدة شهر كامل .تستعملوها في الحلويات و الاطباق .
– تقدرو تستعملو الرحيوات الي حطيتهم في الصورة يعطيوكم افضل نتيجة .
اي سؤال انا في الخدمة

طريقة التحضير بالفيديو :

زر الذهاب إلى الأعلى