دروس

درس مفصل لطريقة تحضير الفواكه الجافة

الدرس الاول
طريقة تحضير الفواكه الجافة –المكسرات الخاصة بالحلويات يعني تحضير اللوز .طريقة تحويل ذوق الكوكاو للوز-طريقة تحويل ذوق الكوكاو الى –لى الفستق-بييستاش- تلوين الجلجلان-تلوين السكر-تلوين جوز الهند –نوادكوكو-
– اولا طريقة تحضير اللوز و حفظه .
– اولا نشريو اللوز في وقت يكون رخيس نغليو الماء و نحطوه فيه من بعد نسلوه ونحطوه ينشف في مكان جاف
-ما تحطوش اللوز قبال الشمس ينشفلكم خطراش يغملكم
– ما تنشفوش اللوز في الفور لانو كاين حلويات ما تصلحلكمش اذا درتوه في الفور مثل الكفتة ومقروط اللوز و عجينة اللوز
-خبيوه في المجمد عادي ما تخافوش عليه وكي نهار تحتاجوه اجبدو كمية و حطوها ديكونجولا و تنشف بين يوم الى يومين
– اذا احتجتو لوز بالقشور دايما اغسلوه مليح وحطوه ينشف.في حالة ما خليتوهش ينشف رايحة هاذيك القشرة يعطيكم ريحة و ذوق ماش مليح في الحلوة نتاعكم.
– اذا احتجتو لوز محمص دايما حمصوه على اقل درجة عندكم في الفور هكذا يعطيكم بنة
– ثانيا الكوكاو :
طريقة تحويل ذوق الكواكاو للوز هاذي حيلة نستعملوها في الحلويات الي ما تقدرش تشري اللوز او للمبتدئات الي يحبو يتعلمو حلويات باش ما يخسروش اللوز .
– الزيت الي في الكوكاو هو الي يخليه يجي ثقيل يعني لازم نتخلصو من الزيت نتاعو باش يولي خفيف كيما اللوز.
– نستعملو كلغ كوكاو تكونو قشرتوه ورحيتوه مدشش خشين نفوروه المرة الاولى فوق لتر ما و حبة قارص مقطعة و ملعقة لافاني ونخليوه يفور كيما البربوشة –الطعام – غير يبدا يخرج البخار يعني تقريبا مدة دقيقتين ما تزيدولوش كتر تنحيوه وتحطوه في القصعة و تحلوه .
وتعاودو تفوروه للمرة الثانية فوق كاس ماء وكاس ماء زهر وحبات قرنفل ومغرفة كبيرة لافاني ونفوروه بنفس الطريقة
– ونزيدو نفوره للمرة الثالثة فوق ماء زهر وحدو و 2 ملاعق كبار عطر اللوز تقدرو تستعملو اما لوز حلو او خليط بين عطر لوز حلو ولوز مر .ونحط الكوكاو في الكسكساس ونغطيوه بطبقة دوائر قارص و نرشو فوقو لافاني و نغطيوه بمناديل الورقية ونخلويه دقيقتين نشوفوه بدا يفور نحيوه نفرغوه في قصعة كيما بربوشة ونحلوه و نحطوه في صينية نفرشولو و نغطيوه بطراشن سواء قماش او ورقية نحاولو نخرجولو هاذاك الزيت الي فيه وكل مرة تحركوه و تبدلولو الطراشن حتى يخلاص منو الزيت و تلقاوه نشف.المدة بين 3 الى 5 ايام
الذوق نتاعو راح يجي شبيه للوز و تستعملوه بديل للوز .ولاحقا ان شاء الله نعطيكم الوصفات الخاصة بيه
انتظروني في الجزء الثاني  في طريقة تحويل ذوق الكوكاو الي البيستاش و ايضا طريقة اخرى لتحويله الى ذوق اللوز.طريقة تلوين السكر و نوادكوكو و الجلجلان لتزيين الحلويات
نقولكم مع السلامة واي سؤال انا في الخدمة

زر الذهاب إلى الأعلى