حلويات

طريقة عمل حلوة البجاوية خطوة بخطوة

الوصفة من اعداد الشاف لبنى

المقادير :

السيرو او العسيلة الثقيلة :      

نضع في كسرونة 500 غ سكر مع 250 ملل ماء ( 2 كيسان سكر + كاس ماء)

عصرة ليمون ( القليل ) ونخليه يثقل علا النار

العجينة :    

نضع 4 بيض نخفقهم ونزيد 500-600 غ فرينة ( علا حساب نوعية الفرينة انا ماكملتليش 600 غ قعدتلي منها 70 غ تقريبا) ورشة ملح ونعجن مليح وندلك مليح حتى تترطب مليح ، العجينة تقعد يابسة نرمدها في الفرينة ونخليها ترتاح ساعتين

نجيب الماكينة ونحل العجينة في رقم 1 ثم نقص ترتيب رقم 4 ثم رقم 7 واخيرا رقم 9 نعود فيها من 3-4 مرات ، ثم نعقبها في ماكينة الرشتة تتقطع زي السباقيتي

نسخن الزيت مليح ونحطها تتقلى ونقص نار نخليها ذهبية اللون فقط ، نحيها ونحطها في بابيي ساغفيات يشرب الزيت

نحطها في قصعة كبيرة ، ونكسرها بيدي نضيف 500 غ مكسرات محمصة ومطحونة خشنة ، ونسقي بالعسل ونخلط مليح

نجيب بلاطو انا استعملت 35*25 سم مثل الصورة ندهنو بالزيت ، ونفرغ الخليط ، نجيب ورق الطهي ونضغط بيدي ، ثم نضغط بالحلال مليح.

نحط البلاطو في الفريجيدار يبرد مليح ونحيه ، نقطع بالموس هنا قطعت مربعات 3*3 سم نتي واختيارك

رح تبقى طرية ومش معمرة عسل وحاكمة روحها ، طبعا الوصفة تقدم مع الحليب ،مع القهوة مع عصير ،وحتى مع التاي ، جميع الاستعمالات

نصيحة الشاف :

العجينة لي تقعد من البقلاوة، القريوش، نفس شيء قطعوها ولكم حرية الاختيار اما تقلو العجينة في الزيت، أو تحمصوها في الفرن، يعني تفرشي ورق الطهي وتخليها الفرن وتحمصيها

حب يقول اذا كان بقاتلكم العجينة من القريوش والبقلاوة احسن شيء تحمصوها لأن فيها لي دام (الزيوت) رح تجي ثقيلة لوكان تقلوها في الزيت

زر الذهاب إلى الأعلى