دروس

مقروط اللوز الجزائري

الدرس الرابع : مقروط اللوز
السلام عليكم ورحمة الله
نبداو على بركة الله : مقروط اللوز
– 500 غ لوز مرحي ،250 غ سكر عادي ،5 ملاعق مرغرين ذايبة – ملعقة مرغرين لكل 100 غ لوز ،بيض ، مبشور الليمون
شربات ،و سكر
– اولا لوز كي تنسلوه خليوه ينشف مليح باش تنجحلكم الحلوة و تجيكم معسلة ،عمركم ما تنشفو اللوز في الفور ،حطوه في بلاصة بعيدة على الشمس خطراش في الشمس يغمل و يفسدلكم
– دايما في مقروط اللوز وزن اللوز ضعف وزن السكر ، نديرو مبشور الليمون و مرغرين ذايبة دايما في الحشو نستعملو لكل 100 غ لوز ملعقة كبيرة ليدام . نخلطوهم مليح ونجمعو بالبيض ،هنا البيض نستعملو بيضة كاملة مع صفار نخلطوهم ونضيفو غير بالشوي حتى يكون حشو طري،لازم تعجنو الخليط مليح بيديكم ماشي بصباعكم لانو كان تعجنوه بالاصابع رايحين تخرجو منو ليدام ،اعجنوه مليح يدخل السكر في اللوز ،العجينة تكون طرية شوي باش كي يريح راح ينشفلكم شوي يجي قدقد ،خليوه يبات ليلة كاملة يعطيك نتيجة روعة او اعجنوه صباح و طيبوه لعشية،
شكلو الحربوش و قطعو مقروطات و زيديو سقمو الحبة شوي في اطراف لازم دخلوهم ما يكونوش حادين باش ما تتحرقلكمش في الكوشة
– حطوها في صينية الفور و تكون مرشوشة مليح بالفرينة خطراش حلوة اللوز تلصق ،نطيبوها على 160 درجة و يكون فور سخون من قبل ،ما لازمش يكون فور بارد ولا درجة اقل من هاذي خطراش فيه البيض ثم ثم يهبط
كي يطيب يدي لون ذهبي فاتح نحيوها و نخليوها تبرد مليح باش نسكروها من الاحسن تخليوها نهار كامل او ليلة باش نسكروه.
– ندخلوه في شربات و نقطروه و ندخلوه في السكر الناعم يكون مغربل ،
شربات: كيلة سكر + 2 كيلات ماء خليوه يغلي نحسبو 7 دقائق و نطفيو عليه
– باش تنقصو عليكم تعب التسكار فرغو كلغ سكر ناعم مغربل في قصعة وحطو الحبات مرة وحدة ،وكل ربع ساعة حركوه بيديكم لداخل كرو العملية 4 حتى 5 مرات ،من بعد نحيوه امسحوه مليح ،
– التسكار يكون مرة وحدة يعني كي تمسحوه ما تعاودوش تسكروه ما تخليوش سكر متراكم من فوق الحبة خطراش هو الي ييبس و يخلي حلوتكم تتشقق
– اي سؤال انا في الخدمة

360 degrés

360 degrés vous propose plusieurs recettes variées , faciles à réaliser et bien entendu succulentes .
زر الذهاب إلى الأعلى