تحليات

وصفة تارتولات تجي تهبل و بنينة و ناجحة مئة بالمئة

تارتولات الموز🍌🍌  الريحة تهبل تهبل 😍😍

المقادير :

2كيسان فرينة مغربلة (مايعادل 300غ)
2 مغارف كبار سكر قلاصي (مايعادل 40غ)
3مغارف كبار مارغرين (مايعادل 150غ)
صفار بيضة
2 مغارف كبار ماء
فانيليا
الكريمة😍😍)بنينة تسخفففف❤❤)
بيضة
2 كأس حليب(نصف لتر)
5مغارف كبار سكر
4 مغارف نشاء ممسوحين
مغرفة فاني
مغرفة زبدة صغيرة
مبشور حبة قارس
عصير نصف حبة قارس
عطر الموز (يزيد النص في البنة لون و بنة)
كاس غير ربع كريم شونتي
نص كاس حليب باااااردا

التزين:     

موز
لاجولي

الطريقة :

نخلط الفرينة و السكر قلاصي و نضيفولهم المارغرين تكون مقطعة (باه تسهللكم العملية) ندخلو المارغرين مع الفرينة حتى تتجانس فيها مليح و نضيفو صفار بيضة و فانيليا و الماء و نخلط مليح مليح (نظغط و نلم)حتى تولي عندنا عجينة طرية و متجااانسة مليح (نخدم بيها مباشرة) مانبعد على سطح العمل نحلها بواسطة حلال متوسطة و نحطها في المول تاعنا نعدلها مليح عليه و نثقبها مليح مليح نحطخا داخل الثلاجة نص ساعة و نجبدهم نزيد نثقبهم و ندخلها في فرن يكون سخون مسبقا على درجة حرارة 200 نخليها تأخذ اللون الذهبي من التحت و من الفوق كي طيب نخليها تبرد مليح و نحط الكريمة و نزينها بالموز كي نكمل ندهنها من الفوق بلاجولي
طريقة تحضير الكريمة
أولا في كسرونة نحط البيضة و السكر و نخلط مليح مانبعد نزيد الحليب و النشاو نخلط بارد في بارد مانبعد نحطهم فوق النار مع التحريك المستمر حتى تعقد ونطفي عليها النار و نزيدلها مغرفة زبدة والفاني و مبشور القارس و عصير القارس و عطر الموز و نخلط مليح حتى تذوب الزبدة و تتجانس و نفرغها في طبسي و نغطيها ب(بابي فيلم)لازم الورق يلامس الكريمة و ندخلها للثلاجة حوالي الساعتين او أكثر تبرد مليح لازم (انا خدمتها في الليل و عمرتهم الصباح)
مانبعد نجيب لاكريم شونتي لي كونا طلعناها مع الحليب مليح و نبداو نزيدولها في الكريمة تاعنا و نخلط حتى تجانس (تجي بنينة تهبل)

زر الذهاب إلى الأعلى